ಇಂಪಾದ ಕೋಗಿಲೆ ಕಲರವ
ಸಂಪಿಗೆ ಸೂಸುವ ಪರಿಮಳ
ತಂಪಾಗಿ ತೂಗಿಬರೊ ತಂಗಾಳಿ
ಯಾವುದರ ಅರಿವಿಲ್ಲ-ನನಗೀಗ ನಿನ್ನದೇ ನೆನಪು
ಕಣ್ಮನ ತಣಿಸುವ ಗಿರಿಸಾಲು
ಮನ ಮುದಗೊಳಿಸುವ ಬೆಳ್ಮುಗಿಲು
ಕಚಗುಳಿಯಿಡುವ ಕಡಲತೀರ
ಯಾವುದೂ ಬೇಕಿಲ್ಲ-ನನಗೀಗ ನಿನ್ನದೇ ನೆನಪು
ಅಸ್ತಗಿರಿಯತ್ತ ಓಡುವ ಸೂರ್ಯ
ಸಂಜೆವೆಣ್ಣಿನ ನೇಸರ ನೆರಳು
ಮುಸ್ಸಂಜೆಯ ದೀಪದ ಬೆಳಕು
ಯಾವುದೂ ತಿಳಿತಿಲ್ಲ-ನನಗೀಗ ನಿನ್ನದೇ ನೆನಪು
ನಿನ್ನೊಲುಮೆಯ ಕಡಲಲ್ಲಿ ತೇಲಿ
ನಿನ್ನ ತೋಳಸೆರೆಯಲ್ಲಿ ಬಂಧಿಯಾಗಿ
ಸದಾ ನಿನ್ನ ಪ್ರೇಮಖೈದಿಯಾಗುವಾಸೆ
ಬೇಗ ಬಾ ಇನಿಯ-ನನಗಂತೂ ನಿನ್ನದೇ ನೆನಪು
-ಶುಭಶ್ರೀ ಭಟ್ಟ
